Coa Real Cédula do 29 de novembro de 1785 comeza a súa actividade o Real Consulado Marítimo e Terrestre da cidade da Coruña, e en 1803 entra en funcionamento, promovida polo  brillante economista e ilustrado  D. Pedro Antonio Sánchez, a Biblioteca do Consulado, que non será  inagurada oficialmente ata o 15 de agosto de 1806.

Ao longo da súa historia cumpriu con eficacia os seus  obxectivos fundacionais, e coa súa propia historia foi creando de forma natural unha importante  documentación de vital importancia para o coñecemento da cidade que a acolle.

Actas do Consulado, Libros da Xunta de Comercio, Libros de asento das escolas de Náutica e Debuxo e libros de contas da Reforma da Torre de Hércules de  Giannini ordenada por Carlos III en 1788, permiten reconstruír fidedignamente o pasado da urbe.

Os preto de 30.000 volumes con que conta na actualidade proceden dos fondos fundacionais do propio Consulado, e as doazóns do Fundador, D. Pedro Antonio Sánchez Vaamonde , así como os procedentes das bibliotecas de D. José  Lucas Labrada, D. Ramón da  Sagra, Marqués de  Miraflores, D José da Torre,  D. José Cornide e D. Anxo  Estévanez nos momentos iniciais, máis a achega  das doazóns de ilustres coruñeses como D. Nicolás Fernández Bolaño, Dna. Xoana de Vega, D. Eduardo Pondal, o Doutor D. Desiderio Varela Puga, a Sociedade Económica de Santiago; en 2005 Dna. Doures Rivas  Troiteiro e D. Xoan Costa entregan unha serie de protocolos notariais do Pazo de Rozas dos s.  XVII e  XVIII; en 2013 recibe parte da biblioteca de D. Javier Rodríguez  Moret, e en 2015 de D. Demetrio Díaz Sánchez, entre outros. Ademais, a Biblioteca custodia a maioría dos libros de D. José Cornide recibidos da súa viúva, non como doazón, senón para saldar unha débeda que o ilustrado tiña co Consulado de Mar e Terra, pois o ilustrado faleceu sen poder completar uns traballos xa cobrados. A iso súmanse as adquisicións ininterrompidas ata o momento, realizadas, en parte, coa renda do capital inicial, en parte coa colaboración das institucións galegas e especialmente co importante legado económico de Dna. María Concepción Sánchez Varela, da familia do Fundador e falecida en 1964.