A apertura ao tráfico marítimo a través do establecemento dos Correos Marítimos e a concesión do libre comercio coas Indias, durante o reinado de Carlos III, favorece o despegamento comercial e o crecemento demográfico da cidade. 

Neste contexto, créase o Real Consulado de Mar e Terra en 1785, institución vinculada ao pensamento ilustrado, con iniciativas de fomento da educación e da actividade agrícola, industrial, comercial e naval. 

Entre os seus proxectos, destaca a reforma da Torre de Hércules realizada por  Giannini, coa que adquire a súa fisonomía actual e asegura a súa conservación,  e que foi realizada con rigor  historicista, baixo a asesoría de José Cornide.

Fundou a Escola de Náutica, onde se formaron os pilotos para o tráfico marítimo e ultramarino e  a Escola de Debuxo, de gran utilidade para artesáns, prateiros, delineantes ou  estampadores de lenzos.

Nos libros de Actas figuran importantes feitos históricos para A Coruña:

• A propia fundación da Biblioteca da Casa Consulado

• As obras de restauración da Torre de Hércules no século XVIII, realizada por Giannini.

• A creación da Escola de Náutica, e das Escolas de Comercio e de Debuxo.

Documentos orixinais sobre as obras de restauración da Torre de Hércules de E.  Giannini, durante o reinado de Carlos III.

A Biblioteca conserva  esta documentación única: a  reforma máis importante da historia do faro romano, que permite á Torre recuperar o seu esplendor e asegurar a súa conservación.

A Real Cédula de creación do Consulado  recolle entre os seus fins o establecemento das Escolas de Náutica e Debuxo. 

Na Escola de Náutica, aprobada oficialmente en 1790, formáronse os pilotos que se relacionarían máis tarde co tráfico ultramarino. Na de Debuxo, que se crea en 1812,  estudaron pilotos e artesáns, como prateiros, delineantes ou  estampadores de lenzos.

A biblioteca custodia os libros de matrícula, de ambas escolas; entre os alumnos Ramón da  Sagra. E os interesantes libros utilizados no ensino:  de navegación,  de astronomía, de xeografía, de álxebra e  trigonometría, de arte.